A ‘Ntinna

A ra festa du paise
Si fau juechi curiusi,
‘Nta li sacchi a piedi chiusi
Chin’è primu adarriva’.

Si fa u juecu de la ‘ntinna
È nu travu de uegliu undatu
A ra cima cc’è appicatu
Nu prisuttu e supressate.

Sunu quattru piecurari
Ca ppe saglie ad iddri è usu,
Ma a su palu scigulusa
Ogne mastru po’ cadi’.

Mo cc’è prova nu furise
Iddru dice: «Io ccia’ fazzu».
Ma a ru ‘mmienzu perde e mforze
‘Nterra cade a scigula’.

Sagle nautru mienzu spiertu
Saglie, scigula e pue è scigulatu
Chinu de uegliu s’è ‘mbrascatu
E u prisuttu ancora è ddra’.

U cchiu’ furbu e ru cchiu’ spiertu
Ca è u mastru ppe’ azziccare,
Chira grazzia a de pigliare
Scigulannu a de arriva’.

Quannu è l’urtima pedata
Si fa forza, vranche e tutu,
Gioia mia, chiru prisuttu
Ccu re manu a de spica’.

Quannu arriva a ra curina
De su travu uegliu undatu,
Dicemilu si ha fatigatu
Ppe’ spica’ cchi’ cc’è sta ddra’.

Gioia mia nu gridu spanne:
«Ohi cchi bella supersata
Mo mi fazzu na sonata
Ca cuntientu sugnu cca’».

Mo s’assetta supra u palu
E ne ‘ncigna na sonata,
‘Mpilliriii….e ‘mpillirata….
Gioia mia maje sciala’.

Mo si ‘mpesa tutttu e tuttu
Scigulannu chianu chianu,
U prisuttu ‘nta na manu
‘Nterra arriva a si ripusa’.

Duna all’autri e supersate
U prisuttu e du furise,
È na festa du paise
‘Ntuernu a ‘ntinna ane balla’.

30 gennaio 2011