C’eranu na vota a su paise
Gente ca ‘nnuminavadi a ventura
Chine jia ddre chissa ppe sbentura
I sanava ccu certe cose ch’iddra sa.
Si dicia ca cc’eranu e magare
Ma nuddru l’ha mai viste se facciudre,
Ppe si sacride cchi facianu chiddre
Ma mai se saputa a verità.
Eranu storie ca cuntavanu se gente
Ppe’ fa spagna?…Oppuru chi l’ha viste?
Cacciale da capu se riviste
Ca sunu ‘ncarne e ossa chiste cca’.
E gente chi currianu ‘nta su vicu
De tutte e parti facianu a filarena,
Chine avia deveru triste pena
Chissa sapia tutta a verità.
Secreti de mistieri tramantati?
O avia nu libru chi cc’è scrittu tuttu?
Chine tu dice… è nu mistieri bruttu
Ca chissa ti guarda, e tuttu fa passa’.
Mancu nu miedicu ccu re miedicine
Tante vote, nun ti sana chissu,
I mali e li duluri ca su spissu
‘Nta famiglia, ca nun pue campa’.
Ma chissa ca sa tuttu du distinu
Si si ‘mprugliatu de l’amure,
Ti caccia sa spina de dulure
E ‘mpace ‘nta la vita po campa’.
Su cose ca non tutti e po’ sapire
Chissu è nu secretu e secreticchiu,
L’ha dittu a chissa, ca ch’iddra era vecchia
E chissa, mo’, a chine l’ha de lassa’?
S’archiviu, piensu, è ‘mpurveratu
Su libru è fattu viecchiu e ‘nciallinutu,
E paggine su storte, e de sputazza undatu
Se parole, chine e lejie, chiste cca’?
Nun ce serve cchiu’ su libricieddru
Ca ‘mmente è tuttu riggistratu,
Forse cc’è natra chi si ‘mpara su filatu
De sa manera, chista po campa’.
Si cc’è sa Za Maria e autre e stesse
È nu filatu viecchiu ‘nta famiglia,
Camina cumu u vientu, e chine u piglia
Forse è natra Magara a Magaria’.
Certamente, ca sa sorta de mistieri
È buenu ppe’ sanare certi guai,
Li dicu, beneditta, si cc’è vai
A malatia a lassi propriu ddra’.
Ogne mistieri è tuttu nu secretu
De chissu nun c’e’ mastru o prufessure,
Nun c’e na scola oppuru nu letture
Ca ‘mparanu si ‘mmischi chi s’hau de fa’.
De chissa Mastra, ca iddra tuttu sape
De s’uecchi ca su fasce e magaria,
Ti tocca ccu na manu, e bonusia
U male ti lu caccia, la’ per la’.
Beneditta za Maria…Cchi manu!…
Tene tutti i fierri du mistieri
Nun su tinaglie, fuerfici o lisieri
Sulu parole, ca sulu iddra e sa’.
Ddruv’è sa Za Maria ca fa se cose?
Na direzione, nu numeru a ra porta?,
Addimmani, e ‘ncunu ti cc’è porta
Cuntientu, la truvata chista cca’.
E parli…parli…lacrime e duluri…
E spuni ‘nta lu sinu de za Maria,
Iddra e piglia, e ‘mmischa, e bonusia
Ccu na parola tuttu fa spari’.
T’allisciadi le manu ccu d’amure
Ti dice: «Va figliolu, cchiu’ nun po’ turnare,
Va’, pigliati s’erva e fala cucinare
Na tassiceddra a sira ppe’ ripusa’».
L’obulu du serviziu e gruessicieddru
De cchiu’ de quantu a ru miedicu l’ha datu,
Ma de cca’ tu tinne vai sanatu
Ddre chiddru, quantu vote a de ji’ a bussa’?
Speramu ca su libru buenu sarvatu
E ‘ncun’autra, na lezione a po lejire,
Ma si chissa, tene natra ca tuttu l’ha de dire
A catina du mistieri, mai si po’ spezza’.
24 maggio 2015
Il Suono d'un Verso 