Quannu arrutati a ru fucune,
Nanna cuntava u fattu de magare
De fulletti e monachieddri,
Si fatti li sapie de chisti e chiddri
E chine cchiu’ ne sa’ e po cunta’.
Ccussi’ ‘incignava u fattu de magare:
«Na vota ‘nta’ se fratte e si spicuni
Escianu facce ca ti fau spagnare,
Vulavanu cum’angili a girare
Chine sa nente cchi jianu a fa’.
Ohi figli mia…su cose malamente,
Pagure n’aju avutu ccu se gente,
Currianu tutte storte, e malamente
Ririennu, si scialavanu cca’ e ddra’.
Nun sacciu ddrue tenianu u riciettu
Ma cumu sacciu, de n’autru chi cuntava,
Eranu supra nu chianu e carvunera,
Tutte, ccu’ na sorta de bannera
Zumpariavanu ‘ntuernu a si sciala’.
E quannu è finita la ballata
Azanu vuelu cumu le crunocchie,
Misericordia, si na pica tu l’aduecchi
Riesti senza jatu, e pue muri’.
Quannu fa scuru chiuditivi le porte
Si trase dintra, mueri de pagura,
Ca chisse su chine de sciagura
Nun sai cchi dispiettu ti po fa’.
Chisse su amiche diavulare
Su ‘nnamurate ccu ru monachieddru,
Si cancianu I dispietti a chistu e a chiddru
È na cuccagna ca nun sai a ddruve sta’».
Na vota mi vuddria na quadara
‘Nta’ lu fucune sientu na risata,
Dicia…«Mo ma fazzu na scialata
Ti la ‘mpacchiu sa bunnanzia chi sta’ cca’».
Quannu mi rispigliu de lu suennu
È deveru sa quadara s’è ‘mpacchiata,
E malanova tua, discraziata
Si ti pigliu, dispettusa, t’aju de ammazza’.
Iddra, de supra I ceramili
Ccu nu risu scattarusu mi rispunne:
«Nun ti sta’ cittu, o ‘nta quadara mi suffunnu
E de se frittule ‘ncanna t’au de resta’».
Discrazzia mia…«Vatinne, malanova,
A nume e Dio e de tutti I Santi muerti,
Vatinne e ddruecu ca male tu mi puerti
Vola ‘nta lu vientu, sperj’e cca’».
Ma chissa cchiu’ dispiettu mi facia
Li ceramili tutti li scummeglia,
S’affaccia de nu grupu e na ferraglia
Senza dienti, spanticata, mi fa spagna’.
Misericordia…a nume du Segnure
Nu nanti core tu mi vo’ fa pigliare,
Tutti I vicini l’ha de rispigliare
Chiru chi a fattu, mo l’ha de cunza’.
Rispunne ccu nu risu scattarusu;
Misericordia, mo sientu na fragascia,
Parica a casa tutta sinne scascia
A ru Segnure mi vuetu ppe prega’.
Cu pacienza mi sperattu sa quadara
E deveru, ca ‘mpacchiata l’è truvata,
Si gruliava, e du dispiettu s’è scialata
E mo’, de s’abbunnanzia le’ jetta’.
Natra vota e fattu la pulenta
E lassu supra u tripidu u piattu,
E ‘nta la notte scinne, parica e nu gattu
Scinniennu a scala nu suniettu fa’:
«Ppu…ppa..ppu..ppa..
Vo’ scattare chi la fa’…
‘Mpacchia cca’…‘mpacchia ddra’..
A ra fine du scalune
Tu cc’è ‘mpacchi lu pedune».
Natru dispiettu mi para u monachieddru
Ca la pulenta a ‘mpacchia ppe’ ra scala,
Cussi’ de nu spicune, iddru sinne sciala
Ed io sagliennu ‘mpacchiu cca’ e ddra’.
Ara matina quannu sagliu supra
Discrazia de li cani cchi macellu,
Su ‘ncumunatu cumpina nu fragellu
Si cride ca ‘mpacchiata riestu cca’.
De ‘nta furneddra cuffa e si dicria
Ca da pulenta mancu sinne mancia,
Miegliu ca minne fuju, sinno’ mi francia
O ccu ra scupa mi siecuta de cca’.
Prima le gente era cchiu’ sincera
E se magare, spirdi e monachieddri,
De ogne rasa escianu si fullettieddri
E pagure tinne davanu a volontà.
Escenu de ‘nte fratte e de jumare
De ‘nta na casa vecchia, o de nu pagliaru.
Sutta nu chiaru e luna si scialaru
Sbattiennu li cuvierchi e zumparia’.
De ddra’ azavanu vuelu ‘ntu paise
Faciennu strusci e muetichiannu e porte,
Le gente ‘nta lu suennu fuje tutte storte
Ppe’ vide cchi succede sutta ddra’.
Ma chisse sinne volanu ‘ntu vientu
Parenu france supra chire scupe,
Gridannu, mi parianu tante lupe
Quannu da fame, nun puetu cchiu’ campa’.
Ancora sinne cuntanu e si fatti
Ca su paised era chinu de magare,
Fimmine ca tessianu a re tilare
Na cosiceddra a sapianu e chire ddra’.
«Si vulie nu carmu du maluecchiu
O si malatu de na brutta malatia,
O si cadutu ‘nta le manu e na majia,
Chissa sepia cumu ti sana’».
Ppe d’ogne cosa ne facia nu ‘mprastu
Lejia nu libru, forse da magara,
Chisa’ddruve l’ha truvatu, su libru,sa busciara,
Ca sul’iddra u sapia gira’.
Le gente, ca de guai e de duluri
Eranu chini, e nun putia campare,
Ma chissa sapia u filatu ppe’ sanare
Ohi…Cchi mmistieri, chissa, ppe’ campa’.
Si primu le magare facianu strusci
Spagnusu ne tenianu nu paise,
E u monachieddru, scattarusu ppe’ re rise
De tuttu chissu, nuddru a s’a verità.
Ma chiru chi cc’è criju ppe’ deveru
De se magare ccu ru core e ccu ra mente,
Ti fa nu ‘mprastu, de acqua, pili e de simente
Ppe’ ti ‘mpruglia’….ca puru a de campa’….
1 agosto 2013
Il Suono d'un Verso 