U Cancieddru

Mentre scinnu de lu puentu
Ccu n’amicu assai fidatu,
De fatiga amu parlatu
E de tante autre cose.

Ni fermamu, pue cchiu’ sutta,
Vide mo, cc’è ru canccieddru,
Cca’ si fa nu mercatieddru
O de pisci o d’autre cose.

È cunzatu a nu spicune
Sa chiusura ferriata
Nu furgiaru l’ha armata
Ccu fatiga e ccu mastria.

Forse e gente de na vota
Cose e nente si ‘mpicciava,
Lotanuse e lieticava
Ppe’ accatta’ e d’esse primu.

Accussi’ u potestate
Ha paratu sa mastria
Ppe’ accatta’ na mercanzia
Nun si fau cchiu’ quistione.

Ma la gente nun sa nente
Cchi si vine a su cancieddru,
O minosce o se grispieddru
Sempre ‘ncunu a de gridare.

Cchi furtuna chi nui avimu
Cc’è Franciscu u Summichele,
Ca ppe’ vine tene u mele
È Avanti sa mastria.

Nun criditi ca Franciscu
Era natu povarieddru
A furtuna appriessu a diddru
La mannatu a su paise.

Era natu Miericanu
E dinari ne facia
A ri tiempi chi curia
E ‘ncappatu ‘nta li ‘ntisi.

Mo tu vidi ‘ntu paise
Ppe’ campare onestamente,
Lu bon core de la gente
Ppe’ Franciscu n’era china.

O discurre ‘mmienzu u puentu
O assettatu a ri muretti,
Ccu nu piattu de spachetti
Ne mmitava a ru Barune.

Pue si i pisci su arrivati
Iddru pronte è ddra’ vicinu,
E si pigliadi u caminu
Ca u bannu a de jettare.

Li cchiu’ gruessi ‘nta’ na manu
‘Nta nu piattu o ‘nta na frunna,
Sunu frischi de chir’unna
Sunu pisci Paulani.

Mo lu dice Miericanu
E ra gente nun capisce
E nun sa’ cchi razza e pisce
È arrivatu a ru cancieddru.

Meracca su marinuetu
È ddra’ dintra carciratu,
Ccu ri pisci ca purtatu
Ti li porjie da ferriata.

Sunu frischi quasi vivi
‘Nta la notte l’ha piscati
Ccu ru ciucciu l’ha purtati
Ohi cchi vita ca de fare.

Ti li gira e ti li vota
Ccu se manu ‘mprasticate,
Fa de schasciu le pisate
Si ti fa nu mienzu chilu.

Mo Franciscu U Summichele
Sta’ gridannu ‘ntu paise
Chine è surdu puru ha ‘ntisu
Ca de jatu ne tenia.

Mo le gente du rinacchiu
Da la cruce o de la chiazza,
Curre tutti ‘nta la chiazza
Ca si pisci au d’ accattare.

Nun si fau chhiu’ quistione
A ra fila su cunzati,
Mienzu chilu bon pisati
Sinne vau murmuriannu.

Chi vo’ fa’ na vinniticchia
O vo fa nu mercatieddru,
De su postu du cancieddru
Si l’affitta «Mille Lire».

Mo nun c’è chi va gridannu
Ppe’ sapi’ cchi cc’è a sa chiazza,
Ca de musica va pazza
Ccu microfani a parlare.

Su canciati ormai li tiempi
Nun si fa’ cumu na vota,
Tante cose hau datu vota
È canciatu lu caminu.

19 ottobre 1994