Mi punciu ccu nu rizzu
De su curciu,
Ohi mamma…cchi dulure
Ca mi vene,
A manu ‘nta la manu m’accartuacciu,
Parica u sangu mi ferma ‘nta le vene.
Pecchi’, tuttu su dulure ‘nta sa manu?…
Sulu pecchi’ mi cuagliu due castagne,
Forse è gelusu ca è sulagnu,
E ppe’ dispiattu mi fa punce ‘nta na manu.
Li dicu ccu’ dulure e ccu’ rispettu:
«Nannuzzu mio, bongiornu, viacchiu curciu,
Io nun mi sugnu riscordatu,
Sempre te tenutu ‘nta su piettu
E nun ru po’ sapi’ quantu te pensatu».
E chin’è benutu cca’ ppe’ si spugare
E pene de lu core ca tenia,
Triste, belle, bone, e chine vo’ amare,
‘Nta sa cupa ccia’ misu tutta a catania.
Na vistu gente de sa via passare
E mo, su tutti a chira parte,
I figli e chiri figli, I vidisti ‘mpassare,
Arripati a sa cupa a cc’è da’ u latte.
Ancora u core tua si move
Ppe’ tante cosiceddre ca cc’è tiani,
Pensa na picca, e mintele a re prove
Quante storie de li tiampi ca tu viani.
Mo tu, ma de cunta’ nu fattariaddru
De quannu, macari, ere guagliune,
Nun dicu de cose, quannu ere picciriddru,
Ma quannu era cchiu’ gruassu u piadicune.
«Ohi picciriddru mio, o figliciaddru!….
Quannu io era n’arvulazzu,
Mi fici ‘nnamuratu de n’aciaddru
Ma chissu nun mi dava nuddru abbrazzu».
Li dicu: «Bella mia, tu nun mi fai n’allisciu?…
Io sugnu forte e ru viantu u risistu,
Nun m’importa de tuttu ca io subisciu
Ppe’ mie è saluta, e tu nun l’hai vistu?»
Ma chissa, culurate avia re pinne
E de canta’, mai na serenata,
A guardu boba, bona, e, sciuaddru vinne
Ca la nascenza nun l’avia nata.
Ohi figliu mio..cchi bue ca io ti dicu….
Certe vote lapparenza ‘ncanna,
E a mmie mi succediu nu fattu anticu,
Ca l’uacchiu, certe vote, ti s’appanna.
E nuddru a su spicune de sa via
Mi voze marita’ de na castagna,
De chira ‘nserta, e beddra, gioia mia,
E nun restava sulu a sa sulagna.
Scapulu restai, si dice, curciu,
E nun putia gusta’ na zichineddra
De chira corchia ca u buanu ‘mpurchia
E cancia tuttu u pede e a pampineddra.
Mo statti cca’ na picca ‘ncumpagnia
Ca curciu su restatu e viacchiu puru,
Cuntala a tutti chista storia mia
Ca de castagne ‘nserte, nun puazzu da’l’aguru.
1 luglio 2008
Il Suono d'un Verso 