Oh Sanbranciscu mio, oh Paulanu
Sugnu ccu ‘lluecchi a tie la tua divuta,
Sugnu ccu l’arma mia la duluruta
Guarda le pene mia ca de sarva’.
Cca’ ‘nchinucchiata fazzu a tridicina
E u ‘mminne vaju si primu u ma parlatu
U core mio tu tocca, ca è chiagatu
Ca nuddru de lu munnu u po’ sana’.
Tocca se gente ccu su vette Santu
Facce nascere du core na funtana,
Ca chine sinne vive na quartana
Tutti li mali brutti po’ sana’.
Guada su munnu ca nun tene fede
Votalu ppe’ ra strata tua chi caminavi,
Parlace a ru core, tu, cumu pregavi
U stessu chi facie quannu ere cca’.
Mo, ‘nta sa ‘gghiesa ca de tie è sarvatu
U mantu, ca ppe ‘nnui è nu trisueru,
A fide ca cc’è puertu, mine mueru
E tuttu lu paise a ti prega’.
Guarda si figli ca su spiernuzzati
Su juti ppe’ su munnu ppe na ragiune,
Cummegliali cu ru mantu ca si u patrune
Sa grazia ti la circu ppe Carità.
U mare ca passatu, e senza vientu
A natra terra jie a priedicare,
Chissa è ra nave tua ppe’ navicare
Portace a ru Segnure sa umanità.
Ferma se guerre!…Ohi…Franci….
Aza su mantu Cumu nu stinnardu,
Chiamali a tie, si mcapusardu
Stampace u signu tua da CARITÀ.
Sa granne petra de su granne munnnu
Mi pare ca va sempre a ru penninu,
Stenne la manu tua, e ru caminu
De tante cose brute e pue ferma’.
Mo’, sugnu vecchia e quasi novantina
Sempre ‘nta sa cchiesa te pregatu,
Te fattu a tridicina e dijunatu
Mo guidami a ru Segnure a ripusa’.
Mo de sa gghiesa ca t’ha veneratu
Chine trase ‘nta se mura su difisi,
Su mantu è na difisa a si Filisi
E ‘nghinucchiuni venenu a ti prega’.
Guardali ccu s’uecchi e Caritate
Scansali, ca tu pue, de malatie,
Ppe chissu sunu devuti viersu a ttie
Ca nun si stancanu ppe’ di’…ma de ajuta’.
Tu ca si ‘cielu e bidi u Patre Santu
Ca ‘mpenitenza e fide l’ha pregatu,
Spanne su mantu tua ca na lassatu
Ca simu figli tua….PPE CARITÀ….
26 agosto 1995
Il Suono d'un Verso 