U Monachieddru

Nu fattarieddru nanna mi cuntava…
Ca una, avia i figli tantu tristi,
Ca, ppe fa sta cittu a chisti,
Nun c’era viersu ppe ri fa acqueta’.

Nu jurnu c’ha persu a pacienza
I fa spagna’ ccu na pagura,
I chiude ‘nta na cammereddra scura
Cc’è dice: «U monachieddru vene a vi piglia’».

Nuddru de chissi dice na parola
E a mamma i guardava de na gaglia,
Ppe’ vide si de chissi u core squaglia
Ppe’ pagura de chiru chi sta’ cca’.

De su grupu l’ha fattu na fiscata
E pue li move nu pede de na cascia,
Ca pare, a casa si scalascia
E chissi, nu gridu: «Ajutu..ohi ma!»

A mamma move cchiu’sa porta
E gridanu si mali spanticati,
Pecchi’ si sentenu perduti
E cc’è prumindenu, ca bueni au de sta’.

Li rapedi sa porta chianu chianu
Nu cancaru stridia ca è arruzzatu
Cc’è dice a mamma: «Sentiti, s’è ammucciatu
E si nun stati bueni, vi venedi a piglia’».

Cce dicedi u cchiu’ spiertu:
«Ma,chissu, addrue ni porta?»
«Ah…sapiti, vi minte ‘nta’ na sporta
E luntanu ccu’ ri sua vi fa sta’».

Sapiti, chissu si chiama monachieddru
Vestutu ccu na lobba e Sanfranciscu
A vucca grossa ccu nu dente, e tu sta friscu
A pagura chi ti pigli, u ra po’ cunta’.

Deveru cc’è sta su malanova
Ca pigglia tutti li guagliuni?
Chiri tantu tisti e su briccuni
I porta addruve iddru sinne sta’?

Allura…io te dittu na busciaria?
Stativi attientu quannu io u chiamu
Iddru sente a vuce de luntanu
E cca’, pronte, ccu’ uddru, a vi purta’.

Ccussi sa vecchiareddra mi cuntava
Su fattu e chissu, ppe ri tene assai ‘mpagura
Si figli, ca ppe iddra era na sciagura
Ppe’ l’acqueta’, na cosa havia de ‘mpenta’.

Ma figliu, su rumanze de le gente
Chissi, Parica ti le vidi a d’ogne ura
Ppe’ ti da nu scantu e na pagura.
Ma figliu…sa razza de gente, mai su state cca’.

Magare e monachieddri eranu assiemi?
E propiu a su paise eranu accasati?
Ancora si cuntanu si filati…
È deveru cc’è su stati chisti cca’?

24 novembre 2014