U Puentu

Cc’è na strata a su paise
A ddru’è larga e ddru’è stritta
Ppecchi miegliu cchiu’ deritta
Nun c’è largu ppe ra fa’.

È ragiune de lu puestu
Su paise è fattu stuertu,
E ra strata e’ fatta tuertu
Nun c’è largu a camina’.

A na parte mo s’allarga
Nun criditi che assai,
Ca la gente passa I guai
Si nu cammiu a de passa’.

Cc’è ru puentu, chi vi dicu
Du paise e numinatu
Ca la gente è arrutatu
Ddra’ si trova ppe’ parla’.

Mo si dice: «Si ne circhi
Na persuna ppe’ nu cuntu,
Tu lu truevi mmienzu u puentu
E discurri I fatti tua».

Ddra’ vicinu cc’è u varvieri
E davanti stau assettati,
O su amici o pensiunati
Fau mmuina e chiacchiaria.

Cc’è su tante putigheddre
E davanti stau cunzate,
O minestra o su patate
O gaddrine, che vo’ accatta’.

Pue, a duminica matina
Tanti amici su arrutati
Mo li vidi ‘ncravattati
De fatiga staud’a parla’.

Mo, chi cunta, sugnu a spassu,
O chi fa na quinnicina,
Chi salute e chi camina
Chissa è a vita chi si fa’.

Quannu è u tiempu de l’elezioni
Pare propiu nu mercatu,
Nuddru vinne o a accattatu
Sulu voti s’au de dare.

Chine è jancu chine è russu
Chi a vo’ cotta, chi a vo’ cruda,
Chine parla e tantu suda
Ppe’ guarda’ i fatti sua.

Mi ricuerdu, a nu barcune
C’era u stemma du crociatu,
Niculetti c’ha parlatu
C’ha prumisu cchi a de fare.

Cumu parla ti fa rire
Ca u dice, ndialettu,
Cancia a lingua ppe’ dispiettu….
No, ppecchi’ nun sa parlare.

«Cumunisti…face gialle…
Ti li chiama salicuni,
Nun criditi….su briccuni
Ca nun sannu cchi au de fare».

Mo sa cchiazza chi viditi
Ca è ‘mmilanza a ru paise,
Quantu gente ca l’ha ‘ntise
E parole ‘nta’ sa via.

Chine dice: «Oh puentu mio
Tu m’ha vistu fare granne,
Mo nun puezzu sta’ a se banne
Ca luntanu mine e jire»….

«Io ti lassu u core mio
Io mi puertu nu ricuerdu,
Puru chine è natu surdu
Sente sempre a vuce tua.

De luntanu mo ti piensu
Tu si statu a casa mia,
Chine vene e cc’è passia
Nun si stanca de cc’è sta’».

O cc’è fa nu filmicieddru
Tutte e cose a registratu,
De l’amici chi ha truvatu
«Mo strincimuni la manu».

Chissu è u puentu, chissu e tuttu
Chistu è statu a vita mia,
Chine è statu ppe’ sa via
Tene u core e cc’è turna’.

31 ottobre 1994