U Ritiru

-1-

Na picca cchiu’ luntanu du paise
Viersu Vucita, vicinu de lurtale
Ccè su ritiru, ddruve nun c’è u male
Ca tutti de sa via amu de passa’.

U vidi cumu e fattu, a tri scarpate,
Supra e cchiu sutta cce staudi i monumenti,
Sagli a scala e cunti li lamienti
Le cunti a chiru bene ca nun po turna’.

Passi, e ti venenu a ra vista
Persuni ca ‘nta vita eranu amici,
Parienti, o li cchiu cari o su nnimici
Ddra’ tuttu è paru, e nun si po parla’.

Puru chi truevi chine ha fattu male
O t’ha traditu o puru rinnegatu,
Puru ca u male sua nun l’ha pagatu
U sa cchi l’è aspettatu, e nu po nega’.

Si chiru chi è campatu ‘ntu palazzu
O natru chi ha durmutu ‘ntu pagliaru,
Si sa ca lautru munnu tuttu e paru
E tuttu chiru chi hai, a de lassa’.

Pue, lassi chisti, e truevi nu guagliune
Ca la spurtuna u caccia de la mamma,
E chissa ciancie e dice: «Oh chira fiamma…
Ca mai du core a puezzu cchiu’ stuta’».

Ddra’ cc’è sta’ puru nanna ccu’ nannuzzu
Cc’è puru mamma e puru u patre mio,
E piensu, ca nu juernu, puru io
Da stessa porta puru aje passa’.

A viju supra supra sa figura
Parica è viva ‘nta su ritrattu,
Parica scinne, e dice: »Cumu si fattu…
Ca de sa vita i stienti a de purta’».

Ti viju caminare ppe’ su munnu
Puru de la morte t’è sarvatu,
Ccu’ ru pensieru mio te cunsulatu
A mammareddra tua, nun ti po’ lassa’.

Cc’è dicu na preghiera e nu precettu
Puru ca a vuce sua ‘nta mente curra,
E lacrimusu guardu natra murra
Tanti ritratti fermi, a mi guarda’.

-2-

Lassamu chiste storie duluruse
Ca de la vita tutta è simminata,
Tutta cumincia quannu chista è nata
Ca sulu u ritiru po’ spezza’.

Su puestu ca io dicu è troppu anticu
Si dice ca l’hau fattu i Fraticieddri,
Ca ppe’ rispettu de li Santi, viat’iddri
Fu nu ritiru de si frati, cca’.

Pecchi’ a fede e ru rispettu a Dio
Ficiru li cummienti e i campuranti,
Campavanu de limuesina e questuanti
Parlavanu a ru munnu de carita’.

Puru na cchiesa cca’ cc’è fravicaru
Ccu’ tutta a divuzione franciscana,
Saglia a Dio na cantata Greguriana
Paria nu paravisu dintra ddra’.

Chista è ra chiesa de Santa Maria
E dintra cc’è puniu nu crucifissu,
U mastru ne muria faciennu a chissu
Pecchi’ tantu u gardava ppe’ sa’ pieta’.

Su crucifissu è unu chi ha parlatu
Unu sta’ a Cielicu, e natru a ra Riforma,
Chine li facia aviadi e sante forme
Ca a mastria sua fu tutta cca’.

Quannu li fici, e guarda ‘nchinucchiatu
E vrazza ‘ncruce e l’uecchi lacrimusi,
«Vi fici io, oh Cristi, ccussi’ piatusi
Ca sinne spezza u core e vi guarda’».

Unu de chissi, allura, l’ha rispusu,
«Tu ca nun c’ere, e mancu mi vidisti,
U Patre mio t’ha dittu, e mi facisti,
Ca s’ere ddra’, cchiu’ piatusu m’havie e fa’».

Senza parole resta, mo, su mastru
Nun si sa chine, de si Cristi a parlatu,
Pecchi’ u mastru resta senza jatu
L’ha scritte ‘nta lu core, e nun si sa’.

Unu de chissi, mo, è ‘nta sa cchiesa
Piensica è statu chissu chi ha parlatu,
«Dicemi na parola, oh Tu ‘nchiuvatu
Chine de vui a dittu sa verità».

-3-

Tu si ru patre, tu si a pietate
Cumu chiru mastru ca u primu t’ha pregatu,
Sarva su munnu, ca de male è chiagatu
E chine vene all’autra parte, falli passa’.

11 novembre 1994